張愛玲提示您：看後求收藏（貓撲小說www.mpzw.tw），接着再看更方便。
素蘭道：“說到後底事體，大家看勿見，怎曉得有結果無結果？我想無撥啥法子，過一日末是一日，碰去看光景。”瑤官插說道：“倪末來裏過一日是一日。耐個後底事體，有點數目來浪。華老爺搭耐好得非凡，嫁得去末，端正享福好哉，阿有啥看勿見？”素蘭失笑道：“耐倒說得寫意哚。要是實概說起來，齊大人也蠻好（口宛），耐兩家頭爲啥勿嫁撥仔齊大人嗄？”瑤官道：“耐末說說正經就說到仔歪裏去！”琪官點頭道：“閒話倒也是正經閒話，總歸做仔個女人，大家纔有點說匆出個爲難場花，外頭人陸裏曉得？單有自家心裏明白。想來耐華老爺好末好，終勿能夠十二分稱心阿對？”
素蘭抵掌道：“耐個閒話故末蠻準，可惜我匆是長住來裏，住來裏仔同耐講講閒話，倒無啥。”瑤官道：“故也陸裏說得定？倪出去也匆曉得，耐進來也匆曉得，耐說個‘碰去看光景’。”琪官道：“我說大家閒話對景仔，倒勿是定歸要來浪一堆；就匆來浪一堆，心裏也好像快活點。”素蘭聞言，欣然倡議道：“倪三個人索性拜姊妹阿好？”瑤官搶說：“蠻好，拜仔末大家有照應。”
琪官正待說話，只聽得外面“歷歷碌碌”，不知是何聲響。琪官膽小，取隻手照拉同瑤官出外照看。那月早移過廂樓屋脊，明星漸稀，荒雞四叫，院中並無一些動靜。兩人各處兜轉來，卻驚醒了榻牀上大姐，迷糊著兩眼，問是“做啥”。兩人說了，大姐道：“下頭來浪響呀。”說著，果然“歷歷碌碌”響聲又作，乃班裏女孩兒睡在樓下，起來便遺。兩人呼問明白，放心回房，隨手掩上房門，向素蘭道：“天要亮哉，倪困罷。”素蘭應諾。瑤官再請素蘭用些茶點，收拾乾淨，自去間壁自己房間睡下。琪官爬上大牀，並排鋪了兩條薄被，請素蘭寬衣，分頭各睡。
素蘭錯過睡性，翻來覆去睡不著；聽琪官寂然不動，倒是間壁瑤官微微有些鼻聲。俄而一隻烏鴉“啞啞”叫著，掠過樓頂。素蘭揭帳微窺，四扇玻璃窗倏變作魚肚白色，輕輕叫琪官不答應，索性披衣起身，盤坐牀中。不想琪官並未睡著，僅合上眼養養神，初時不應，聽素蘭起坐，也就撐起身來，對坐攀話。
素蘭道：“耐說倪拜姊妹阿好？”琪官道：“我說勿拜一樣好照應，拜個啥嗄？要拜末今朝就拜。”素蘭道：“好個，今朝就拜。那價個拜法囗？”琪官道：“倪拜姊妹，不過拜個心。擺酒送禮多花空場面，才用勿著，就買仔副香燭，等到夜頭，倪三個人清清爽爽，磕幾個頭末好哉（口宛）。”素蘭道：“蠻好，我也說寫意點好。”
琪官見天已大明，略挽一挽頭髮，跨下牀沿，趿雙拖鞋，往牀背後去。一會兒，出來淨過手，吹滅梳妝檯上油燈，復登牀擁被而坐，乃從容問素蘭道：“倪拜仔姊妹，賽過一家人，隨便啥閒話纔好說個哉。我要問耐，倪看個華老爺無啥（口宛），爲仔啥勿稱心嗄？”素蘭未言先嘆道：“（要勿）說起，說起仔末真真討氣！俚乃個人倒勿是有啥個勿稱心，我同俚樣色樣蠻對景，就爲仔一樣勿好。俚乃個人做一百樁事體末，定歸有九十九樁勿成功哚。有點幹己個事體，俚乃生來勿肯做。就教俚做樁小事體，俚乃要四面八方通通想到家，是匆要緊個，難末再做；倘然有個把閒人說仔一聲勿好，就匆做個哉。耐想實概個脾氣，阿能夠討我轉去？俚自家要討也匆成功。”琪官道：“倪一徑來裏說，先生小姐要嫁人，容易得勢，陸裏一個好末就嫁撥仔陸裏一個，自家去揀末哉。故歇聽耐說華老爺，例劃一爲難。”
素蘭轉而問道：“我也要問耐，耐兩家頭自家算計，阿嫁人勿嫁人？”琪官亦未言先嘆道：“倪末再要爲難也無撥！故歇無啥人來裏，搭耐說說勿要緊。倪從小到個該搭，生來纔要依個大人，依仔哉（口宛），故末真間架。大人六十多歲年紀哉，倘忙出仔事體下來，像倪上勿上下勿下，算啥等樣人嗄？難要想着仔嫁人末，晚哉！”素蘭道：“坎坎瑤官來浪說，出去也說勿定，阿是實概個意思？”琪官道：“俚乃肚皮裏還算明白，就不過有點勿着落。看仔末十四歲，一點勿懂輕重，說得說勿得纔要說出來。耐想倪故歇阿好說該號閒話？坎坎幸虧是耐，碰着別人說撥大人聽仔末，也好哉！”
琪官一面說，一面打了個呵欠。素蘭道：“倪再困歇罷。”琪官道：“生天要困囗。”素蘭便也往牀背後去了一遭，卻見一角日光直透進玻璃窗，樓下老婆子正起來開門，打掃院子，約摸七點鐘左右，兩人趕緊復睡下去。素蘭道：“晚歇耐起來末喊我一聲。”琪官道：“晚點末哉，勿要緊個。”這回兩人神昏體倦，不覺沉沉同人睡鄉。
直至下午一點鐘，兩人始起。瑤官聞聲進見，笑訴道：“今朝一樁大笑話，說是花園裏逃走兩個倌人。幾花人來浪反，一徑反到我起來，剛剛說明白。”素蘭不禁一笑。
